实体肩键爽过 ASUS ROG 5? 黑鲨 4 上手评测 玩后体验分享

2021-05-13 12:03:17

唔知大家平时打机,玩开咩嘢 Game 呢? PUBG Mobile 曾经 hit 过一段时间,而家大家仲有无玩呢? 的而且确现时係少咗好多人玩,但版主有时老婆仔女训哂觉,夜澜人静嘅时候,都会开嚟玩吓 (虽然近期少咗玩 PUBG 多咗玩 Switch 嘅芒亨,我谂呢期好多人都係玩芒亨)。由 2019 年开始,我打机就一直用 ASUS ROG Phone 2,近期开始转 ROG Phone 5,点解用佢,因为市场无对手,尤其佢嘅肩键玩枪 Game 最爽。但而家终于有另一部手机吸引到我,佢就係黑鲨 4,即场借走做开箱评测,顺便比较下同 ROG Phone 5 感觉有乜唔同。事不宜迟,Let's Go!


  144Hz 屏幕刷新率 + 720Hz 触控採样率 秒杀 ASUS ROG Phone 5? 作为一部电竞游戏手机,对我嚟讲无可能无内置肩键,尤其玩枪 Game 最有用。所以我一直都话,ASUS ROG Phone 系列呢方面确实係几成功,又咁讲,以前黑鲨呀、RAZER 呀出所谓嘅电竞手机,实在太失败,想要有类似肩键嘅功能,你仲要另外买个配件,进一步咁讲,都唔方便啦。而黑鲨终于听到我嘅声音,知道打机嘅人有啲乜需要,今次呢部黑鲨 4,终于加入咗肩键,而且係实体,而非 ROG Phone 5 嘅所谓超音波触控设计,我个人咁睇,觉得有实体键实在好太多,揿係几好揿嘅,但黑鲨 4 係咪真係畀到好正、好得心应手嘅游戏体验畀我,反应够唔够快,呢个係后话,讲咗手机外型先~

虽然一部游戏手机嚟讲,个样就唔係重点,但都要讲下。今代黑鲨 4 外型上比以前係普通咗,但相对以前嘅设计,「陆味」无咁重。屏幕尺寸又係同其他小米手机咁,都係同一个模,都係 6.67 吋,解像度 2400 x 1080,对比度 5,000,000:1,用咗穿窿芒设计,不过个窿直径唔大,只有 2.76mm,算係比大部分穿窿芒手机细。另外,黑鲨 4 同 ROG Phone 5 一样,都係支持最高 144Hz 屏幕刷新率,同时亦可按照个人喜好同需要,自订 120Hz、90Hz 或 60Hz 嘅屏幕刷新率。

仲有一点,ROG Phone 5 触控採样率都只係 300Hz,讲到触控延迟只有 24.3ms,好似好劲,但黑鲨 4 有成 720Hz 嘅触控採样率,理论多指触控延迟低至 8.3ms,游戏中嘅最低枪击延时亦低至 24ms。触控採样率愈高,代表屏幕接收到你手指发出嘅指令后,作出嘅反应时间亦会愈快。


▲ 黑鲨 4 包装盒。


▲ 包装盒侧面见到写住支持 Hi-Res Audio。


▲ 跟机配件有火牛、Type C 充电线以及硬胶壳。


▲ 火牛支持 67W 快速充电。


▲ 6.67 吋 1080p 屏幕。


▲ 前置镜头个窿好细。


▲ 机背设计无以前咁浮夸,陆味都无咁浓。


▲ 具有三镜头。


▲ 机底有充电插槽以及 3.5mm 耳机孔。少少使用感:因为 3.5mm 耳机孔打横部手机係设于下方位置,当你使用肩键而又用有线耳机果阵,会顶住好唔就手,而 ASUS ROG Phone 5 设于上方,会感觉无咁顶住手掌,打机会舒服一啲。所以如果你用肩键又打机,最好就唔好用有线耳机,戴返蓝牙耳机啦!


▲ 右侧除咗有结合指纹辨识嘅电源键,上下两方都会有肩键以及肩键嘅开关,开咗肩键就会弹出嚟,唔用果阵关咗佢,肩键就会收返埋。


▲ 左侧係 SIM 卡槽以及音量键,老实讲音量键喺左边,我会有少少唔惯。仲有一点都係无 ROG Phone 5 咁好嘅,係佢无一个畀人侧面充电嘅插槽,当你玩啲横向画面嘅 Game,就会顶住唔就手,最后玩玩下会忍唔住拔走充电线......
  S870 不是问题?黑鲨 4 效能测试 同样地,作为一部电竞游戏手机,强悍嘅处理器同样相当重要。所以,黑鲨 4 都係用上旗舰级数嘅处理器,但可能就係因为 S888 供不应求嘅缘故,为咗可以满足到货量,黑鲨 4 退而求其次用上比 S865 Plus 强,但比 S888 弱嘅 S870 处理器。无所谓嘅,老实对我嚟讲就算 S865 Plus 已经好够用,S870 对我嚟讲无乜问题,若果成本较低,无必要用到 S888。另外,黑鲨 4 会有两个容量版本,分别为 8GB RAM + 128GB ROM 以及 12GB RAM + 256GB ROM 嘅版本,电池容量有 4500mAh。最后,实际效能表现如何,我哋都係例牌用安兔兔评测以及 AndroBench 5 应用程式,测试一下黑鲨 4 CPU / GPU 实力,以及 ROM 嘅读写速度。


▲ 安兔兔跑分成绩为 613539 分,当中 CPU 成绩有 142534 分,而 GPU 成绩则有 244058 分,虽然总分比不上 S888 处理器,但呢个性能玩大部分嘅手机 Game 都好够用。


▲ AndroBench 5 用来测试 ROM 读写速度,连续读取以及连续写入分别为 1661.11 MB/s 以及 747.31 MB/s,代表佢係用上咗 UFS 3.1;至于随机读取及随机写入速度则分别为 288.13 MB/s 以及 257.1 MB/s,速度算挺快,代表在使用体验上理论上也会很顺畅。
  实体肩键才是正路!黑鲨 4 游戏实际体验分享 一部电竞游戏手机嘅灵魂,就係用佢嚟打机嘅表现。虽然而家係少咗人玩 PUBG 食鸡,但无计因为版主我自己间唔中仲有玩开,最后我都係用佢食咗场鸡。对比起 ASUS ROG Phone 5,黑鲨 4 实体肩键确实相对超音波触控好,首先你更容易知道自己有无揿到,其次手感更佳。我用 ROG Phone 5 打机嗰阵,唔係话 ROG Phone 5 唔好,但容易会有误触嘅情况,尤其 ROG Phone 3 开始已经玩到愈嚟愈多按键,净係肩键都可以变到又 L1/L2 同 R1/R2,你唔係实体键真心好易揿错,同埋 Air Trigger 灵敏度调高,会容易 Hi 到,灵敏度调低,揿果阵又好似唔係咁舒服。所以总括嚟讲,我觉得黑鲨 4 今次係做得唔错,最紧要係,价钱都平一大截。

顺带一提,用黑鲨 4 玩 PUBG 嘅过程中,手机完全唔觉得有发热嘅情况,呢样相信係得益于佢用咗第四代三文治液冷散热系统,BTW 都係名一个,佢用乜技术用乜原理唔多讲,反正大家都无乜兴趣,总之我试过,结论係玩完唔热,咁即係佢个散热係 Work,完。

不过,游戏体验虽然唔错,但初次使用设置肩键位置,有少少麻烦。首先你要打开「游戏空间」,你可以喺 App Drawer 都开佢出嚟,亦可以同时揿住左右肩键打开;之后进入游戏,打开游戏助手嘅方法係:屏幕左右两角向内斜拉,简单嚟讲就係好似 V 字咁,从两角向住手机部分拉,但我发觉超难拉佢出嚟,好难用;呢方面 ASUS ROG Phone 5 就做得好好,好简单左边边缘滑一滑,就可以拉个游戏工具列出嚟,轻鬆易用。


  黑鲨 4 三镜头相机实拍 最后,虽然黑鲨 4 係一部用嚟打机嘅手机,而唔係 Sell 相机,不过当你真係买咗部手机返嚟,你就唔会净係用嚟打机咁简单,唔通打机又要一部手机,影相又要一部手机咩?所以,呢度我都係咁易畀几张用黑鲨 4 影嘅相畀大家睇下。

睇相之前,先了解黑鲨 4 相机嘅规格,佢係用咗三镜头,分别为:

- 48MP 四合一高解像度镜头 (F1.79 光圈)
- 8MP 120 度超广角镜头 (F2.2 光圈)
- 5MP 2cm 微距镜头 (F2.4 光圈)

好,试相来了,无特登周围跑,简单啲喺发布会现场间餐厅度,影一啲相畀成像你睇:
   
小结
初试黑鲨 4 呢部游戏手机,我觉得打机果阵肩键手感相比 ASUS ROG Phone 5 更好,但有些设计上嘅,则未必及 ROG Phone 5 聪明,例如 3.5mm 耳机孔嘅摆位、无侧面充电嘅功能等等。无嘅,只好打机果阵唔好有线耳机,唔好一边叉电一边玩,咁就问题不大嘅。最紧要係,佢价钱唔算贵,最平 $3798 已经有交易,网友又会唔会考虑吓佢呢?留言讨论下啦!

黑鲨 4 (8+128) 在文章发表时,建议零售价为 $3798,按这里有详细规格及最新卖价。

郑重声明:本文版权归原作者所有,转载文章仅为传播更多信息之目的,如作者信息标记有误,请第一时间联系我们修改或删除,多谢。